GULLY BOY

GULLY BOY
Review Rowdy -

Plot = My review for this movie will be completely in GULLY BOY ishtyle!

Bole Toh, apun ka review ekdum chhapri bhaasha mein hoingaa.

To ye picture apne 2 bantaai NAEZY aur DIVINE ki jindagi par banaayeli hai.

Yahaan apna bhidu Muraad (Ranveer Singh) Dhaaravi mein ek maachis ke dabbe jaisi kholi mein rehta hai, lekin sapne desh ka sabse bada RAPPER banne ke dekhta hai.

Uska khadoos driver baap, Shakir (Vijay Raaz), hamesha uske sapne ki VAAT lagaane ki koshish karta hai. Lekin Muraad ki apni muraad (bole toh ichcha) poori karne mein uska khaas bhidu MC Sher (Siddhant Chaturvedi) uski madad karta hai. Aur Sher aur SKY (Kalki Koechlin) ki madad se, apna Muraad STAR ban jaata hai!


Opinion = Jabse iss picture ka trailer YOUTUBE par upload kiyela hai, tabse hi log galaa faad faadke APNA TIME AAYEGA, APNA TIME AAYEGA, gaa rele hai. Iss gaane ne dhoom machaayeli hai aur sabke gale FAAD diyele hai.

Gale ke saath saath, picture ne audience ki expectation ko bhi FAAD diya hai, multiplex ka parda bhi FAAD diyela hai, saare sound system bhi FAAD diyele hai, matlab picture ekdum FAADU hai bantaai.

Ye unn picturon mein se hai jinka pehla bhaag faadu hota hi hai, lekin doosra bhaag aur bhi YAAHOOM hota hai.

Poori picture mein saare bhidu log ekdum hard RAP kar rele hai, aur public theatre mein seeti aur taali bajaate hue thak bhi nahin raeli hai.

Apun ko to full PAISA VASOOL entertainment mila bachchi!

Picture ke andar apne bhidu Muraad ki jindagi ekdum jhand bataayeli hai. Wo ek Driver ki aulaad hai jiski samaaj mein koi izzat, koi aukaat nahin hai.

Uski daav Safeena (Alia Bhatt) ke baap ke paas Muraad se zyada paisa hai, to wo ghanta apni beti ki shaadi uss fakkad se karaayega.

Muraad ka baap 2 auratein rakhta hai, to uski jindagi mein tension full on rehta hi hai.

To poori picture mein public sirf music aur rap se khush rehti hai, baaki sab baton ne dil ko tod diyela hai.

Ye picture ko akela dekha to log JHANDU bolenge. Isiliye apne saath 2 – 4 bhidu logon ko jama karo, aur theatre mein macha ke aao !

Performances = Ranveer Singh picture ko poori tarah se khaa gayela hai. Iss bantaai mein talent ki koi kami nahin hai. Ye ab itna hard ho chuka hai, ki industry ke baaki saare actors ki to vaatich lag gayi hai.

Muraad ka character Ranveer ke liye hi likha gayela tha, aisa lag rahela hai.

Aur apni bachchi Alia Bhatt, ekdum sumdi mein gumdi karke nikal gayeli hai.

Ye Udta Punjab ke baad Alia ki sabse hard performance hai.

Vijay Raaz aur Amruta Subhash (Muraad ki Maa) ka kaam bhi bahut hard hai.

Baaki saare actors ko full on footage mila aur un logon ne screen par yahoom acting kareli hai.

Pehli baar bade parde par aake Siddhant Chaturvedi ne parda faad diyela hai. Wo ekdum RAPPER ki tarah dikha aur uske hi tarah baraabar bakchodi bhi kiya.

Picture ki manhoosiyat hai Shweta (Kalki Koechlin), jisko public SKY karke bulaati hai.

Ye aurat agar SKY mein hi rehti aur dharti pe aake picture mein acting nahin karti, to hi achcha hota.

Kalki ki sadeli acting ne mood ki vaat hi laga daali.

Baaki ke jitney bhidu log, jo rapper banke aaye the parde par, sabne bahut hard kaam kiya hai.


Direction & Other Technical Aspects = Zoya Akhtar ko kandhe pe uthaake naachane ka mann kar rahela hai bhidu. Kya direction diyela hai bhaa.

Poori picture par Zoya ki pakad majboot hai. Khaali apun ko ek hi shikaayat hai unse.

Picture mein jiss tarah se Muraad ka video viral hota hai You Tube pe, agar jindagi mein aisa hi hota, to Digital Marketing wale saare bhidu log ghar mein baithke khatmal maar rahe hote. Jab poori picture yahoom banaayi, to ye part mein bachkaandi harkat kyun kardi Zoya ne?

Picture ka music sabse zyada hard hai, aur jab APNA TIME AAYEGA parde par aata hai, public majboot enjoy karti hai.

Picture ke saare RAP bahut hi hard aur yaahoom bane hain.

Jo bantaay shooting mein camera pakdela tha, usne DHARAAVI ko bahut hi majboot tareeke se dikhaaya hai.


Rowdy Rating = 4 / 5  

 

 

Please follow and like us:
0


Leave a Reply

Your email address will not be published. Required fields are marked *


Enjoy this blog? Please spread the word :)